Ինչպես և կանխատեսվում էր, Իսպանիայի առաջնության եզրափակիչ տուրից հետո, այժմ արդեն պաշտոնապես, «Բարսելոնայի» հարձակվող Լիոնել Մեսսին հռչակվեց Պրիմերայի 2012-13 թթ. լավագույն ռմբարկու։ «Կապտանռնագույնների» առաջատարն իր հաշվին ունի 46 գոլ։

Արգենտինայի հավաքականի հարձակվողը Մադրիդի «Ռեալի» գոլահար Կրիշտիանու Ռոնալդուին գերազանցել է 12 գնդակով։ Լավագույն ռմբարկուների եռյակը եզրափակել է Մադրիդի «Ատլետիկոյի» նախկին հարձակվող Ռադամել Ֆալկաոն, ով հեղինակել է 28 գոլ։

Գոլահարների քառյակում, 25 գոլերով, կարողացել է ամրապնդվել «Սևիլիայի» ֆուտբոլիստ Ալվարո Նեգրեդոն՝ շնորհիվ հունիսի 1-ին «Վալենսիայի» հետ կայացած մրցավեճում «չղջիկների» դարպասին ձևակերպած պոկերի (4:3): Ի դեպ, Նեգրեդոն մեկ գոլ ավելի է խփել, քան իրենց թիմի երեկվա մրցակցի հարձակվող Ռոբերտո Սոլդադոն։

Հիշեցնենք, որ Մեսսին նախորդ տարի ևս դարձել էր Իսպանիայի առաջնության լավագույն ռմբարկու՝ այդ անգամ իր հաշվին գրանցելով 50 գոլ։